حقيقة طريقة تشغيل عداد الكهرباء مسبق الدفع على شريحة قليلة طول الشهر

– الكلام ده غير صحيح. الحكومة نفت وجود طريقة شحن تتسبب بإدخال المواطنين في شريحة أعلى، أو ثبات المستهلك على شريحة واحدة طول الشهر. ✅✅

– الإشاعة دي اتنشرت قبل كدا، والمركز الإعلامي لمجلس الوزراء نفاها في أغسطس 2019، وقال إن فيه سعر لكل شريحة، بيدفعه المستهلك حسب كمية استهلاكه ونوع النشاط اللي المشترك تعاقد عليه (سكني أو تجاري أو صناعي). ✅✅
– الحساب بنظام الشرائح بيبدأ من الشريحة رقم 1 مع بداية الشهر، وهي الأقل سعرًا، وكل ما المستهلك يخلص شريحة يدخل في اللي بعدها.
الشركة القابضة لكهرباء مصر
– وخصم الرصيد بيتم تلقائيًا بناءً على شريحة المشترك الحالية.
المستهلك مش بيثبت على شريحة معينة إلا الشريحة الأخيرة لو وصل لها، وهي أغلى شريحة، لكن مع بداية الشهر الجديد يعود تلقائيا للشريحة الأولى.

– أسعار الشرائح وكمية الاستهلاك المخصص لكل شريحة، معروفة ومعلنة من قبل الحكومة، وفيه شرائح استهلاك منخفض، وشرائح متوسطة، وأخرى عالية.

*على سبيل المثال: الشريحة الأولى مخصصة لاستهلاك من 0 لـ50 كيلو وات، والمستهلك بيدفع فيها 38 قرش مقابل كل كيلو وات. الشريحة الثانية مخصصة لاستهلاك من 50 لـ100 كيلو وات، وسعر الكيلو وات فيها 48 قرش.

– فيه فروق أسعار بيتم تحصيلها في حالات معينة. على سبيل المثال، الشريحتين الأولى والتانية مخصصين لمحدودي الدخل، وفي حالة وصول المستهلك للشريحة الثالثة بيتحصل منه قيمة استهلاك وفقا الشريحة الثالثة للاستهلاك من 0 لـ200 كيلو وات، وسعر الكيلو وات فيها 65 قرش. وبيتم الخصم من كارت الشحن بأثر رجعي.

– كمان لو وصلت للشرائح العالية (فوق 650 كيلو وات) بتحصل نفس عملية الخصم بأثر رجعي، وبيتحسب الاستهلاك من 0 لـ1000 كيلو وات ب 118 قرش لكل كيلو وات. ولو تجاوزت الألف كيلو وات بتدفع 145 قرش على كل كيلو وات استهلكته من أول الشهر، وبيتخصم فرق السعر بأثر رجعي أيضًا.

– بخلاف أسعار الكمية المستهلكة من الكهرباء، فيه مصروفات أخرى بتتخصم من قيمة الشحن. المستهلك بيدفع مقابل خدمة عملاء آخر كل شهر، من 1 إلى 40 جنيه حسب شريحة الاستهلاك اللي وصلها، يعني مثلا لو وصل للشريحة التالتة، بيدفع 6 جنيه، ولو وصل الشريحة الخامسة هيدفع 15 جنيه، ولو وصل السابعة هيدفع 40 جنيه.