تطبيق Truepic للتحقق الفوري من الصور والفيديو

الإدعاء

## تطبيق Truepic للتحقق الفوري من الصور والفيديو القدرة على التعديل والتلاعب في المحتوى المصور (صور أو فيديو) واستخدامها في ترويج الأخبار غير الصحيحة أو الكاذبة، وصلت لمستوى كبير جدا حاليًا، مش بس مجرد الصور اللي بنقوم بالتحقق منها بشكل يومي في صفحة متصدقش. مثلا، من خلال تقنيات الذكاء الصناعي ممكن يتعمل فيديو بيحاكي نبرة صوت وحركات شخصية مشهورة مثلا بشكل يقدر يخدع ملايين ممكن يصدقوا بسهولة الكلام اللي اتقال خلاله. لكن لحسن الحظ، فيه تطبيق عظيم ظهر في 2016، اسمه Truepic، وهو تطبيق بيعرف نفسه بأنه "كاتب رقمي" للتحقق من الصور والفيديو حاصل على براءة اختراع نتيجة للتقنيات المتقدمة جدا اللي بيعتمد عليها عشان يقول بشكل حاسم إذا كانت حاجة معينة شوفناها على الإنترنت صحيحة ولا غلط. التطبيق مجاني ومتاح للاستخدام على أنظمة أبل وأندرويد. ومن خلاله نقدر نوفر الكتير من الوقت للتحقق من الأشياء المتداولة على الإنترنت ويساعدنا نقرر إذا كنا هنعمل شير لبوست من عدمه عشان منساهمش في تداول حاجات غير صحيحة. ** طيب إزاي نستخدمه؟ بمجرد ما تحمل صورة من موبايلك على التطبيق بيقوم في ثانيتين بالتحقق من الصورة للتأكد من أنه ماتمش تغييرها أو تعديلها بأي شكل، وبيحدد وقت التقاطها ومكانها (في حالة تشغيل صاحب الصورة للـ GBS). ومن خلاله تقدر تفحص العلامة المائية على الصور ومقارنة ما إذا كانت متناسبة أو متسقة مع بيانات الصورة، سواء وقت التقاط الصور، والموقع الجغرافي. وبيتم تخزين الصورة في وقت لاحق في التطبيق، وتحصل كل صورة على رمز من ستة أرقام. ميزته كمان إنه بيتحلى بأعلى معدلات الأمان ومراعاة خصوصية مستخدميه في أكتر من 100 دولة في العالم بيتم استخدامه فيها، خاصة لما تكون مناطق عالية المخاطر وعرضة لمحاولات اختراق. ** مين ممكن يستخدمه؟ - كمواطن عادي ممكن تستخدمه مثلا في معرفة إذا كانت صور المنتجات اللي ناوي تشتريها من مواقع عالمية للتجارة الإلكترونية، زي eBay لإثبات صحة وحالة اللي بتشتريه. مثلا لو هتشتري عربية تعرف إذا كانت صورتها تم تعديلها وهل موجودة في المكان اللي أعلن البائع وجودها فيه. وكمان تقدر تتحقق من حالة الفنادق والأماكن السكنية اللي بتحجزها اللي شوفت صورها، وهل هي حقيقة، زي التأكد من الإعلانات عن ده على خدمة Airbnb... وممكن تتأكد من هوية الأشخاص اللي بتتكلم معاهم على مواقع التعارف، مثلا على تطبيق Tinder. الصحفيين كمان التطبيق بيوفر لهم وقت كبير للتحقق من الصور المتداول لحاجة بتحصل على الأرض، خاصة المراسلين في مناطق النزاعات أو الأزمات الإنسانية بشكل يساعدهم في إخبار حقيقة ما يحدث بدقة. المؤسسات العاملة في مجال الإغاثة وتوصيل المساعدات، يعني مثلا لو جهة دولية فيه قوافل مساعدة لمنطقة معينة ممكن خلال الصور الواردة من العاملين في جهات توصيلها، تقدر تتأكد إذا كانت وصلت فعلا للمستفيدين منها ولا لاء. المنظمات المهتمة بحقوق الإنسان ممكن يساعدها في إثبات صحة حدوث انتهاكات لمجموعة من البشر في مكان معين، وبالتالي يساهم في حدوث استجابة سريعة، وتوفير صورة واضحة لما يحدث بشكل يسمح باتخاذ قرارات مناسبة مبنية على حقائق موثوقة. #اعرف_بنفسك