حقيقة تصريحات وزير النقل عن سعر تذكرة تروماي المغرب

– الكلام ده غير صحيح. سعر تذكرة التروماي في المغرب أقل من كده بكتير. تكلفة تذكرة الرحلة الواحدة في تروماي الدار البيضاء بتوصل لـ7 درهم للرحلة والدرهم = 1.87 جنيه مصري، يبقي تكلفة الرحلة = 13 جنيه مصري. ✅✅
– نظام التذاكر هناك متقسم على إنك بتشتري كارت بـ2 درهم بيكون صالح استخدامه لرحلتين وتكلفة الرحلة 6 دراهم يعني تعمل رحلتين تكلفتهم 14 درهم حوالي 26 جنيه.

– في كمان نظام الاشتراك الأسبوعي، وده تكلفته 60 درهم = 112 جنيه مصري، وبيسمح لمن يحمل الاشتراك بركوب المترو عدد لا نهائي من المرات خلال الأسبوع. وفي نظام اشتراك شهري تكلفته 230 درهم = 430 جنيه مصري، وبسمح الاشتراك ده لحامله بركوب المترو عدد غير محدود من المرات. أما في مصر فسعر الاشتراك الشهري بيتراوح بين 130 و260 جنيه، وبيدي لصاحبه عدد 60 رحلة فقط.

– كمان بما إن الوزير قارن بين سعر التذكرة في مترو القاهرة وسعر تذكرة تروماي الدار البيضاء، فلازم كمان يقارن بين الحد الأدنى للأجور في البلدين. في المغرب الحد الأدنى للأجور في الوظائف الحكومية هو 3000 درهم (315 دولار)= 5610 جنيه مصري، والحد الأدنى في الوظائف الخاصة هو 2570 درهم = 4805 جنيه مصري، وده في الوقت اللي الحد الأدنى للأجور في مصر = 1200 جنيه بس (67 دولار). يعني الظروف مش متشابهة زي ما الوزير بيقول.

– كمان في حاليًا خلاف في المغرب بين النقابات والحكومة بسبب الحد الأدنى للدخل، ففي حين الحكومة عارضة زيادته 400 درهم (يعني يبقى 3400 درهم) للقطاع الحكومي، النقابات تطالب كمان مع ده بتخفيض ضريبة الدخل وإن الزيادة تبقى شاملة كل الموظفين.