زيادة أسعار الوقود يونيو المقبل

– بعد انتشار تصميم فيه أسعار الوقود المتوقعة بعد الزيادة اللي هتتم في شهر يونيو الجاي، الحكومة نفت صحة التصميم وأكدت إنه لا صحة على الإطلاق للصورة المتداولة بالأسعار الجديدة للوقود، وقالت إنه في حال وضع أي أسعار جديدة للوقود هيتم الإعلان عنها بكل وضوح وشفافية بقرارات رسمية، وأن كل ما يثار في هذا الشأن مجرد شائعات لا أساس لها من الصحة تستهدف إثارة البلبلة بين المواطنين.

– الموضوع اختلط على الناس، وفي ناس فهمت إن بيان الحكومة بيعني إن مفيش زيادة في الأسعار في يونيو. وده خلانا نحاول نفهم إيه الحكاية؟

*هل أسعار الوقود هتزيد في يونيو الجاي؟

– أيوه أسعار الوقود هتزيد في شهر يونيو الجاي، بحسب صندوق النقد الدولي، اللي نشر من كام يوم مراجعته الرابعة لبرنامج قرض الـ12 مليار دولار اللي مصر أخدته، وقال إنه تلقى رسالة من الحكومة المصرية في يناير اللي فات، أكدت فيها نيتها إلغاء الدعم على معظم منتجات الطاقة بحلول 15 يونيو الجاي، وده بيعني زيادة سعر البنزين والسولار والكيروسين وزيت الوقود.

– الحكومة لم تنفِ ما نشره صندوق النقد الدولي بخصوص رفع الدعم عن المنتجات البترولية، وحتى بيان الحكومة اللي معانا ده منفاش نيتها رفع الأسعار، لكنه نفى فقط صحة الأسعار الجديدة المتداولة، وقال إنه لما تتحدد الأسعار هنعلنها.

*طب إيه حجم الزيادة في الأسعار؟

– بحسب كلام الحكومة لصندوق النقد، ففي نية لتطبيق “آلية التسعير التلقائي” اللي اطبقت على بنزين 95 من بداية شهر أبريل.

– آلية التسعير التلقائي اللي اطبقت على بنزين 95 دي عبارة عن معادلة بتشمل سعر البترول العالمي + سعر صرف الجنيه أمام الدولار + تكلفة عملية التصنيع ونقلها وشحنها وتوزيعها والرسوم عليها، وفي النهاية يطلع لك رقم هيبقى ده سعر لتر البنزين.

– الحكومة علشان تحافظ على سعر البنزين مستقر إلى حد ما، خلت تغيير سعر بنزين 95 بيتغير كل 3 شهور بحد أقصى صعود 10% وحد أدنى هبوط 10%. يعني لو لتر بنزين 95 مثلًا متسعر بـ10 جنيه النهارده، فتغيير السعر الجديد هيكون بعدها بـ3 شهور ولو طلع الزيادة مش هتكون أكتر من 10% يعني جنيه واحد ويبقى سعر اللتر 11 جنيه، ولو نزل الهبوط مش هيكون أكتر من 10% يعني جنيه واحد بردو ويبقى سعر اللتر 9 جنيه.

– واللي حصل مع بنزين 95 هو نفسه المتوقع يحصل مع باقي أنواع البنزين، وده بحسب رسالة الحكومة إلى صندوق النقد اللي قالت فيها إنها “ستطبق آليات تسعير مماثلة لآلية بنزين 95 مع للمنتجات الأخرى في يونيو القادم، مع توقع إن أول تعديلات في الأسعار في منتصف سبتمبر القادم”.