News Guard; أداتك لتقييم مصداقية ما تقرأه من أخبار

– في محاولة لمساعدة جمهور القراء على معرفة مدى مصداقية الأخبار اللي بيقرأوها وتقييم مصادرها، ظهر مؤخرًا في الولايات المتحدة مبادرة اسمها “News Guard”.

– المبادرة اللي بتعتمد على عشرات الصحفيين المُدربين هدفها الأساسي مراجعة أكتر من 7500 موقع إخباري ناطق بالإنجليزية، بالتزامن مع انتخابات الأمريكي في نوفمبر اللي جاي، لكن عملها مُستمرة.

-الفايدة من المبادرة مش بيستفيد منها الأمريكيين بس، لكنها مهمة لينا لو مهتمين نتابع مصادر الأخبار الإنجليزية ونستقى معلومات دقيقة منها، لأنه بعض الأطراف هنا ساعات بيستخدموا مواقع الأخبار الأجنبية غير الموثوقة كحجة لدعم موقف معين متسق مع أفكارهم أو لمجرد الترويج لأخبار كاذبة.

** طب ازاي الأداة دي بتشتغل؟
– من جوجل بلاي ممكن تعمل داونلود للبلوجين الخاص بالأداة وتسطبها على جوجل كروم، ومع قراءتك لأي من المواقع الإخبارية الأجنبية مفروض الأداة بتدي لك تقييم لمدى مصداقية خبر معين والمؤسسة الصحفية، من خلال مؤشرات باللونين (الأحمر، الأخضر).

– لو المؤشر أحمر ده معناه الصحيفة أو الموقع ده مش بيراعي المعايير الأساسية للعمل الصحفي، أو بيستخدم في بث الأخبار الكاذبة أو أعمال البروباجندا، وده بيساعد القراء على فهم سياق وطبيعة اللى يتم بثه.. في حين يعني الأخضر العكس تمامًا.
– كمان القائمين على الخدمة، اللي اتكلفت 6 ملايين دولار لإطلاقها، بيقولوا إنه مع الوقت ده هيدفع المعلنين للخوف على سمعتهم التجارية وبالتالي عدم إعلانهم على المواقع الإخبارية غير الموثوقة.

– مش بس كده، لكن كمان الأداة أو الخدمة بتعطي معلومات عن تاريخ الموقع ومين صاحبة ومين شغال فيه، والمشكلات التحريرية اللي وقع فيها قبل.